di Pipeen Crespi (anno 1982)
Cent’ann fa e anca prima
Ghea già la banda citadina
La fea sunà il Tadinoon
In di grandi ucasioon
La se fermaa in temp da guera
E questa le una roba vera
Par mancanza di suna duur
Ca ian al fronti a fass unuur
Apena dopu l’armistizi
La riprendûû il servizi
E par i fiô lea una gioia pazza
Quand gandea la banda in piazza
Il Praostu adre ala funzioon
Ga dean fastidi i frama zoon
E alura a dila propi ciara
La trai in pe una fanfara.
Cunt un bass un bumbardee
Querci curneta e claree
E cul tambuur e il tamburell
La furmaa un grûpetu bell
I fiô da buna volontà
In vurûû imparà a sunà
in pochi al la se fai granda
La diventaa una bela banda.
La sunea adre la funzioon
Dil Corpuss e l’Ascensioon
A Natal la sunea la pia
Fin al di da l’Epifania
Guidaa d’un maestar espertu
A Sant’Arliqui ghea il cuncertu.
Par cuprì un po da spees
La sunea ai festi di paees
Quela banda di fiô
Ala suna ammaò incô
Adess ghe deen di artista
Ca i sunan a prima vista
Par daghi un nuovo stile
fan sunà il sesso gentile
Che sal sunea a qui tempi là
Fursi a impareu anca mi a sunà.